ہیڈلائنز

Reporter WU

Write on ھفتہ, 17 فروری 2018

سابق صدر آصف علی زرداری کا کہنا ہے کہ راؤ انوار بہادر بچہ ہے، ایم کیو ایم کے خلاف آپریشن میں حصہ لینے والے 54 ایس ایچ اوز میں سے صرف راؤ انوار ہی زندہ بچا ہے باقی سب مارے گئے۔

 

پیپلز پارٹی کے شریک چیئرمین آصف علی زرداری نے ایک انٹرویو میں کہا ہے کہ راؤ انوار ان بہادر بچوں میں سے ایک ہے جو ایم کیو ایم سے لڑنے میں بچ گیا، کراچی  آپریشن  میں 54 ایس ایچ اوز شامل تھے ان میں سے 53  مارے گئے اور صرف ایک راؤ انوار بچا ہوا ہے۔

ایک سوال کے جواب میں سابق صدر کا کہنا تھا کہ راؤ انوار نے 444  ماورائے عدالت قتل کیے یہ صرف کہنے کی باتیں ہیں، یہ سارے نیوز آئٹمز ہیں، اگر ایسا ہے تو پھر 444  پٹیشنز کورٹ میں ہونی چاہئیں تھیں۔

 آصف زرداری کا کہنا تھا کہ سپریم کورٹ کے لگائے ہوئے آئی جی سندھ کی سربراہی میں پولیس نے راؤ انوار سے متعلق رپورٹ جمع کرادی  ہے راؤانوار کے ایشو کو دیکھا جائے اور سمجھا جائے سب کو  دوبارہ  اس سارے معاملے پر غور کرنا چاہئے۔

راؤ انوار کے رابطوں سے متعلق سوال پر آصف زرداری نے کہا کہ راؤ انوار انہیں تو فون نہیں کررہا، آئی جی سندھ کو کیا ہے تو انہیں چاہیے کہ ایجنسیز سے کہہ کر  پتا کرائیں کہ فون  کہاں سے آرہا ہے۔

Write on ھفتہ, 17 فروری 2018

وزیراعظم شاہد خاقان عباسی نے کہا ہے کہ عدالتوں میں عوامی نمائندوں کو مافیا، چور اور ڈاکو کہنا کسی صورت قبول نہیں ہے۔

حافظ آباد میں مستحقین میں صحت کارڈز کی تقسیم کی تقریب سے خطاب کرتے ہوئے وزیراعظم شاہد خاقان عباسی کا کہنا تھا کہ سیاست کے فیصلے پولنگ اسٹیشنوں میں ہوتے ہیں اور فیصلہ عوام کا ہی مقدم ہوتا ہے۔

وزیراعظم شاہد خاقان عباسی کا کہنا تھا کہ عدالتیں جو فیصلے کرتی ہیں اسے قبول کرتے ہیں چاہے لوگ اور تاریخ قبول کرے یا نا کرے لیکن پارلیمنٹ کا بنایا ہوا قانون ختم یا رد کرنے کو قبول نہیں کریں گے۔

ان کا کہنا تھا کہ عدالتوں میں عوامی نمائندوں کو مافیا، چور اور ڈاکو کہنا قابل قبول نہیں، ادارے اپنی حدود میں رہ کر اپنا کام کریں اور دوسروں کے کام میں مداخلت نہ کریں۔

انہوں نے کہا کہ سیاست کے فیصلے عوام پولنگ اسٹیشن میں کرتے ہیں، ایک فیصلہ لودھراں میں سامنے آیا ہے جس میں عوام نے نواز شریف کی سیاست کا فیصلہ کر دیا ہے اور ایک فیصلہ جولائی 2018 میں بھی سامنے آئے گا۔

وزیراعظم شاہد خاقان عباسی نے کہا کہ پارلیمنٹ ایسا ادارہ ہے جس کا ہر 5 سال بعد احتساب ہوتا ہے لیکن ضرورت اس بات کی کہ ہر ادارہ اپنا کام کرے دوسروں کے کام نہ کرے۔

ان کا کہنا تھا کہ ملک کو آگے بڑھانے کے لیے ضروری ہے کہ ادارے ایک دوسرے کا احترام کریں اور ہر ادارہ اپنی آئینی حدود کے اندر رہ کر کام کرے۔

انہوں نے کہا کہ سینیٹ انتخابات میں دھاندلی نہیں ہونے دیں گے، عوامی نمائندے اپنی خدمت کر سکتے ہیں یا ملک کی، دونوں ایک ساتھ نہیں چل سکتے۔

Write on ھفتہ, 17 فروری 2018

کراچی: چیف جسٹس پاکستان میاں ثاقب نثار نے شاہ رخ قتل کیس کے ملزم شاہ زیب جتوئی کو جیل میں سہولیات ملنے پر برہمی کا اظہار کرتے ہوئے آئی جی جیل خانہ جات سے استفسار کیا ہے کہ پھانسی کے ملزم کو کال کوٹھری میں رکھنے کے بجائے اسپتال کیوں بھیجا گیا۔

 سپریم کورٹ کراچی رجسٹری میں شاہ زیب قتل کیس کے مرکزی ملزم شاہ رخ جتوئی کو جناح اسپتال منتقل کرنے کے حوالے سے کیس کی سماعت ہوئی۔ آئی جی جیل خانہ جات نصرت منگن نے عدالت کے روبرو مؤقف پیش کیا کہ جیل انتظامیہ کی سفارش پر ملزم شاہ رخ جتوئی کو جناح اسپتال منتقل کیا گیا۔ چیف جسٹس نے ریمارکس دیئے کہ آپ نے بہت اچھا کام کیا، شاہ رخ جتوئی کے حوالے سے رپورٹ میں کیا لکھا ہے ؟ کیا اسے دل کا مرض تھا؟ رپورٹ پیش کی جائے۔

آئی جی جیل خانہ جات نے ملزم شاہ رخ جتوئی کی رپورٹ پڑھ کرسنائی۔ چیف جسٹس  نے رپورٹ سننے کے بعد سخت برہمی کا اظہار کرتے ہوئے ڈائریکٹر جناح اسپتال کو مخاطب کرتے ہوئے کہا سیمی جمالی یہ آپ کے اسپتال کی کارکردگی ہے، شاہ رخ کو دل کی شکایت تھی لیکن بیماری بواسیر کی نکلی، یہ رپورٹ تیار کرنے والے ڈاکٹر شاہد رسول کہاں ہیں؟ ہم پنجاب کے ڈاکٹرز کا میڈیکل بورڈ بنائیں گے۔ چیف جسٹس نے کہا شاہ رخ جتوئی کی کوئی سرجری کی گئی؟ ہم نے جب نوٹس لیا تو شاہ رخ کو ڈسچارج کردیا گیا، کیا قانون صرف غریب آدمی کے لئے ہے۔

 چیف جسٹس نے آئی جی جیل خانہ جات سے استفسار کیا کہ شاہ رخ کو کہاں رکھا ہوا ہے؟ نصرت منگن نے جواب دیا کہ جب تک سپریم کورٹ کی جانب سے سزا یقینی نہ ہوجائے اس وقت تک ملزم کو سی کلاس میں رکھا جاتا ہے، چیف جسٹس نے سخت اظہار برہمی کرتے ہوئے کہا کہ تم کب سے آئی جی ہو؟ تمہیں پتہ نہیں سزائے موت کے ملزم کو کال کوٹھری میں رکھا جاتا ہے، ایک پھانسی کے ملزم کو سی کلاس دیا گیا اسے کال کوٹھڑی میں کیوں نہیں رکھا گیا۔ چیف جسٹس نے آئی جی جیل خانہ جات سے جیلوں سے اسپتال میں منتقل قیدیوں کی تعداد اور نام طلب کرتے ہوئے حکم دیا کہ جیل حکام کل تک  تمام ریکارڈ پیش کریں کہ کون کون سا ملزم جیل سے اسپتال منتقل ہوا۔
Write on ھفتہ, 17 فروری 2018

لاہور: انسداد دہشت گردی کی خصوصی عدالت نے قصور کی 7 سالہ زینب سے زیادتی و قتل کے مجرم عمران کو 4 بار سزائے موت سنادی۔

انسداد دہشت گردی کی خصوصی عدالت کے جج سجاد احمد نے زینب زیادتی و قتل کیس کا فیصلہ سنایا، جسے ملکی تاریخ کا تیز ترین ٹرائل قرار دیا جارہا ہے۔

سماعت کے بعد میڈیا کو بریفنگ دیتے ہوئے پراسیکیوٹر جنرل احتشام قادر نے بتایا کہ مجرم عمران کو کُل 6 الزامات کے تحت سزائیں سنائی گئیں۔

انہوں نے بتایا کہ مجرم عمران کو ننھی زینب کے اغوا، زیادتی اور قتل کے ساتھ ساتھ 7 اے ٹی  اے کے تحت 4،4 مرتبہ سزائے موت سنائی گئی۔

دوسری جانب عمران کو زینب سے بدفعلی پر عمرقید اور 10 لاکھ روپے جرمانے جبکہ لاش کو گندگی کے ڈھیر پر پھینکنے پر7سال قید اور 10 لاکھ جرمانےکی سزا بھی سنائی گئی۔

پراسیکیوٹر جنرل نے بتایا کہ ٹرائل کورٹ سزائے موت کی توثیق کے لیے ریکارڈ ہائیکورٹ کو منتقل کرے گی، جہاں 2 رکنی بنچ مجرم عمران کی اپیل سنے گا۔

انہوں نے بتایا کہ ہائیکورٹ آرڈر بھی مثبت آیا تو عمران سپریم کورٹ میں اپیل کر سکتا ہے۔

پراسیکیوٹر جنرل کے مطابق مجرم کے پاس اپیل کرنےکے لیے 15 دن ہیں جبکہ اس کے پاس صدر مملکت سے رحم کی اپیل کا حق بھی ہے۔

انہوں نے بتایا کہ تمام مراحل کے بعد عمران کی سزائے موت پر عمل درآمد کیا جائے گا۔

پراسیکیوٹر جنرل نے مزید بتایا کہ عمران کے خلاف دس پندرہ دن میں دیگر واقعات کے ٹرائل مکمل ہوجائیں گے۔

ان کا کہنا تھا کہ عمران سے عدالت نے آخری وقت تک پوچھا تو اس نے خدا کو حاضر ناظر جان کر اعتراف جرم کیا۔

پراسیکیوٹر جنرل احتشام قادر کا کہنا تھا کہ پاکستان کی تاریخ میں پہلی دفعہ ایسا ہوا ہے کہ سائنٹیفک تحقیق کی بنیاد پر مجرم کو سزا دی جارہی ہے اور ہم اُن ممالک میں شامل ہوگئے ہیں جہاں سائنسی بنیادوں پر ثبوتوں پر سزا دی جاسکتی ہے۔

Write on جمعہ, 16 فروری 2018

کراچی: متحدہ قومی موومنٹ (ایم کیو ایم) پاکستان کے رہنما فاروق ستار نے سینیٹ الیکشن کی نشست کے معاملے پر رابطہ کمیٹی کو پیشکش کی ہے کہ وہ اپنی مرضی کے چار اراکین کے نام دے دیں۔

کراچی میں میڈیا سے گفتگو کرتے ہوئے انہوں نے کہا کہ تحیل شدہ رابطہ کمیٹی ہمیں اراکین کے نام دے دیں، وہی ہمارے امیدوار ہوں گے۔

فاروق ستار نے کہا کہ نام منتخب کرنے میں میری کوئی مرضی شامل نہیں ہوگی اور نہ ہی میرا ان سے کوئی رابطہ ہوگا۔

فاروق ستار نے کہا کہ یہ فیصلہ انہوں نے تنظیم بچانے کے لیے ایم کیو ایم کے رہنماؤں سے مشورے کے بعد کیا۔

Write on جمعرات, 15 فروری 2018

گوجرانوالا: جناح اسٹیڈیم میں میوزک کنسرٹ کے دوران اسٹیج گرنے سے نامور پوپ گلوکارہ عینی خالد زخمی ہوگئیں۔

گوجرانوالہ کے جناح اسٹیڈیم میں نجی کالج کی جانب سے میوزک کنسرٹ کا اہتمام کیا گیا تھا جس میں نامور گلوکارہ عینی خالد پرفارم کررہی تھیں۔ کالج کی طالبات عینی خالد کو دیکھ کر نہایت پرجوش تھیں۔ وہ عینی کے ساتھ سیلفی لینے کے لیے اسٹیج پر چڑھ گئیں۔

اسٹیج ایک ساتھ اتنا وزن برداشت نہ کرسکا اور نیچے گرگیا، اسٹیج کے گرتے ہی اس پر موجود گلوکارہ عینی خالد اور طالبات بھی نیچے گرگئیں جس کے نتیجے میں عینی خالد سمیت تمام طالبات زخمی ہوگئیں لیکن خوش قسمتی سے کسی کو بھی شدید نوعیت کی چوٹ نہیں آئی۔

 

واضح رہے کہ اسٹیج گرنے کی ویڈیو سوشل میڈیا پر وائرل ہورہی ہے، سوشل میڈیا صارفین نے اس واقعے پر سخت برہمی کا اظہار کرتے ہوئے کہا ہے کہ  اسٹیج گرنے کا واقعہ معمولی نہیں آخر انتظامیہ اتنی لاپرواہ کیسے ہوسکتی ہے۔

Write on جمعرات, 15 فروری 2018

ریاض: سعودی عالم دین احمد قاسم الغامدی نے ویلنٹائن ڈے (جسے محبت کا عالمی دن بھی کہاجاتا ہے) کے حوالے سے کہا ہے کہ یہ ایک  سماجی تہوار ہے اوراسے منانے میں کوئی شرعی پابندی نہیں۔

مکہ مکرمہ میں امربالمعروف و نہی عن المنکر کمیٹی کے سابق ڈائریکٹرجنرل قاسم الغامدی نے عرب ٹی وی سے بات کرتے ہوئے کہا کہ ہم عالمی سطح پر کئی دن مناتے ہیں مثلاً والدین کا عالمی دن، ماں کا عالمی دن، استاد کا عالمی دن یاخواتین کا عالمی دن وغیرہ، یہ سب سماجی نوعیت کے  ایام ہیں ان کا براہ راست مذہب کے بنیادی عقائد کے ساتھ کوئی تعلق نہیں اور نا ہی اسلام میں ایسی سماجی و ثقافتی سرگرمیوں کی کوئی ممانعت ہے۔ ویلنٹائن ڈے یا محبت کے عالمی دن کو منانے میں بھی کوئی شرعی پابندی نہیں۔

علامہ قاسم الغامدی نے کہا کہ اسلام بھی لوگوں کے درمیان اچھی بات کو عام کرنے کی تلقین کرتا ہے۔ اگر آپ کسی کو کسی بھی حوالے سے مبارکباد پیش کرتے ہیں تو اس میں کوئی حرج نہیں، خیر اور بھلائی کی بات صرف مسلمانوں سے نہیں بلکہ یہود و نصاریٰ کے ساتھ بھی کی جاسکتی ہے، البتہ براہ راست جنگ کرنے اور لڑنے والے عناصر اس میں شامل نہیں۔ انہوں نے کہا نبی اکرم ﷺ اپنے یہودی پڑوسیوں کے ہاں آتے جاتے رہتے اور ان کے مسائل کے حل میں ان کی مدد کرتے۔ اللہ کافرمان بھی ہے’’لوگوں سے اچھے طریقے سے بات کرو‘‘۔

علامہ قاسم الغامدی کا کہنا تھا کہ ویلنٹائن ڈے کے مخالفین اسے اسلام کے ساتھ جوڑتے ہیں اور دعویٰ کرتے ہیں کہ یہ جاہلیت کے تہواروں میں سے ایک ہے، اگر کوئی  شخص تہوار منانے کی کوشش کررہاہے جس کا اسلام میں کوئی وجود نہیں تو وہ اسلامی تعلیمات کی خلاف ورزی ہے۔ مگر ویلنٹائن ڈے ایک سماجی تہوار ہے، اس تہوار کے موقعے پر ہم ایک دوسرے کے لیے محبت کے جذبات کا اظہار کرتے ہیں۔

ایک سوال کے جواب میں الغامدی نے کہا کہ یہودیوں اور عیسائیوں سمیت دیگر غیر مسلموں کو عید اور تہواروں پر ہم انہیں مبارکباد پیش کرسکتے ہیں۔

Write on جمعرات, 15 فروری 2018

وزیراعلیٰ پنجاب شہباز شریف نے کہا ہے کہ آئندہ انتخابات میں مداریوں، زردایوں اور جھوٹے خانوں کو شکست ہو گی۔

بورے والا میں جلسے سے خطاب کرتے ہوئے شہباز شریف کا کہنا تھا کہ نوازشریف نے قوم سے وعدہ کیا تھا کہ 5 سال میں لوڈ شیڈنگ ختم کر دیں گے، ساڑھے 4 سالوں میں ہی اندھیرے دور ہو گئے ہیں، سی پیک، وفاق اور پنجاب نے مل کر 10 ہزار میگاواٹ بجلی کے منصوبے لگائے۔

انہوں نے کہا کہ ساہیوال میں 1320 میگاواٹ بجلی کا منصوبہ کام کر رہا ہے، ہزاروں میگاواٹ بجلی کے منصوبے پنجاب اور وفاق نے ملکر لگائے، دو تین ماہ بعد گرمیاں آئیں گی لیکن کمروں میں پنکھے چل رہے ہوں گے، دکاندار اپنا سامان فروخت کر رہا ہو گا اور اسپتالوں میں بجلی موجود ہو گی۔

وزیراعلیٰ پنجاب نے کہا کہ اللہ نے ہمیں لودھراں میں عزتوں سے نوازا، این اے 154 میں ضمنی الیکشن میں ترین صاحب نے کروڑوں اربوں روپے خرچ کیے لیکن لودھراں کے ووٹرز نے نیک اور درویش صفت اقبال شاہ کو منتخب کیا۔

انہوں نے کہا کہ لودھراں کے ضمنی انتخاب میں جہانگیر ترین نے ہیلی کاپٹر اور پیسے کا بے دریغ استعمال کیا، لوگوں کو فی ووٹ کے حساب سے 5 ہزار روپے دیے گئے لیکن عوام نے امیر ترین جہانگیر ترین کے بیٹے علی ترین کو بدترین شکست دی۔

شہباز شریف نے کہا کہ عمران خان نے 2013 کے الیکشن میں کہا کہ خیبر پختونخوا میں سے پورے ملک کو بجلی مہیا کریں گے لیکن آج 5 سال بعد کہتے ہیں کہ 74میگاواٹ بجلی پیدا کی، خان صاحب قوم کو بتائیں کہ وہ 74 میگاواٹ بجلی کہاں ہے؟

ان کا کہنا تھا کہ جب پنجاب میں ڈینگی کا حملہ ہوا تو ہمیں ڈینگی برادران کہا گیا لیکن ہم نے اللہ کے سامنے سرجھکا کر مدد مانگی اور آج ڈینگی کا علاج ہمارے لیے بائیں ہاتھ کا کھیل ہے۔

انہوں نے مزید کہا کہ جب پشاور میں ڈینگی آیا تو خان صاحب بھاگ کر پہاڑوں پر چڑھ گئے، وہاں دوائیاں اور میڈیکل ٹیمیں ہم نے بھجوائیں، خان صاحب کہتے تھے کہ میٹرو نہیں اسپتال بنانے ہیں لیکن میٹرو کے نام پر پورے پشاور کو کھود کر رکھ دیا ہے، پشاور والوں نے (ن) لیگ کو ووٹ دیا تو ہم وہاں میٹرو بنا کر دکھائیں گے۔

عمران خان کو جھوٹوں کا آئی جی قرار دیتے ہوئے خان صاحب نے خود کوئی کام نہیں کیا اور یہاں آ کر ترقیاتی کاموں میں رخنا ڈال رہے ہیں، انہوں نے چینی صدر کے دورہ پاکستان میں 7 ماہ کی تاخیر کروائی، دھرنے نہ ہوتے تو ترقیاتی کام 7 ماہ پہلے پورے ہوتے۔

وزیراعلیٰ پنجاب نے کہا کہ نیازی صاحب کو مشورہ دیتا ہوں کہ جتنا جھوٹ بولنا ہے بول کر گھر چلے جائیں کیونکہ سیاست آپ کا کام نہیں ہے۔

آصف زرداری کو تنقید کا نشانہ بناتے ہوئے شہباز شریف کا کہنا تھا کہ زرداری صاحب کہتے ہیں کہ لوٹی ہوئی دولت واپس لاؤں گا، زرداری صاحب اب بھی وقت ہے کہ جوعوام کی دولت آپ نےلوٹی ہے واپس لے آئیں، 2018 کے الیکشن کے بعد زرداری کی لوٹی دولت واپس لا کرعوام کے قدموں میں رکھیں گے۔

شہباز شریف نے کہا کہ عمران خان اور آصف زرداری نے اپنے صوبوں میں کچھ نہیں کیا، دونوں اپنے صوبوں کے عوام کو منہ نہیں دکھا سکتے۔

وزیراعلیٰ پنجاب نے وہاڑی میں زرعی یونی ورسٹی اور دریائے ستلج پر پل بنانے کا اعلان کرتے ہوئے کہا کہ الیکشن جیت کر کراچی، پشاور اور کوئٹہ کو بھی لاہور بنا دیں گے اور انشاءاللہ اقبال اور قائد کا خواب پورا ہو گا۔

انہوں نے کہا کہ پنجاب کے ہراسپتال میں سی ٹی اسکیشن مشینیں لگائی جا ری ہیں جہاں کسی غریب یا مزدورکوعلاج کے لیے پیسا نہیں دینا پڑے گا کیونکہ مفت علاج ہو گا۔

ان کا کہنا تھا کہ موبائل اسپتال دیہات میں آئیں گے، وہیں سٹی اسکین اورعلاج کی سہولیات فراہم کی جائیں گی۔

شہباز شریف نے کہا کہ 9 سالوں میں 15 ارب روپے کے وظیفے مہیا کیے گئے، پنجاب کے 3 لاکھ یتیم بچوں کو 9 سال سے وظائف مل رہے ہیں جن سے بچے ڈاکٹرز اور انجینئر بن رہے ہیں۔

ان کا کہنا تھا کہ پنجاب بلا سود قرضے دیے جا رہے ہیں جن سے سوا کروڑ افراد مستفید ہو رہے ہیں، پاکستان کی 70 سالہ تاریخ میں ایسی مثال نہیں ملتی۔

صفحہ نمبر 1 ٹوٹل صفحات 50
Clear

11°C

اسلام آباد

Clear
Humidity: 57%
Wind: NW at 11.27 km/h
Wednesday 13°C / 20°C Mostly sunny
Thursday 12°C / 20°C Partly cloudy
Friday 11°C / 19°C Scattered showers
Saturday 10°C / 15°C Scattered showers
Sunday 11°C / 13°C Showers
Monday 11°C / 16°C Scattered showers
Tuesday 12°C / 17°C Partly cloudy

تازہ ترین خبریں

کالم / بلاگ