ہیڈلائنز


کورٹ کا سوشل میڈیا پر موجود توہین آمیز مواد فوراً بند کرنے کا حکم

Written by | روزنامہ بشارت

ہائی کورٹ نے پاکستانی حکام کو سوشل میڈیا پر موجود تمام مذہب مخالف اور توہین آمیز مواد فوراً بلاک کرنے کا حکم دیا ہے۔

یہ حکم ہائی کورٹ کے جج شوکت عزیز صدیقی نے مقدس ہستیوں کے بارے میں توہین آمیز مواد کی سوشل میڈیا پر موجودگی کے بارے میں درخواست کی سماعت کے دوران دیا۔

انھوں نے ایسا مواد شائع کرنے والے افراد کے نام ایگزٹ کنٹرول لسٹ میں بھی شامل کرنے کا حکم دیا ہے۔

جسٹس صدیقی نے اس سلسلے میں بدھ کو وزیرِ داخلہ کو بھی ذاتی حیثیت میں طلب کیا تھا تاہم جب سماعت شروع ہوئی تو عدالت کو مطلع کیا گیا کہ ناسازی طبع کی وجہ سے چوہدری نثار پیش نہیں ہو سکتے۔

تاہم سیکریٹری داخلہ، آئی جی اسلام آباد پولیس اور چیئرمین پی ٹی اے آج عدالت میں موجود تھے۔

نامہ نگار شہزاد ملک کے مطابق سماعت کے دوران جسٹس شوکت صدیقی کا کہنا تھا کہ 'لبرل ازم دہشت گردی سے بھی زیادہ خطرناک چیز ہے' اور ایسا گستاخانہ مواد شائع ہونے سے مسلمانوں کے صبر کا پیمانہ لبریز ہوتا جا رہا ہے۔

انھوں نے سیکریٹری داخلہ کو حکم دیا کہ ایسے مواد اور اس کے ذمہ داران کی نشاندہی کے لیے ایک مشترکہ تحقیقاتی کمیٹی تشکشیل دی جائے جس کے تمام شرکا آئین کے مطابق مسلمان ہونے کی شرط پر پورا اترتے ہوں۔

واضح رہے کہ شوکت عزیز صدیقی نے ہی گورنر پنجاب سلمان تاثیر کے قاتل ممتاز قادری کے خلاف مقدمے سے دہشت گردی کی دفعات ختم کرنے کا حکم دیا تھا تاہم سپریم کورٹ نے اس فیصلے کو معطل کر دیا تھا۔

درخواست گزار سلمان شاہد کے وکیل طارق اسد کی جانب سے متنازع مواد شائع کرنے والے افراد کے نام ایگزٹ کنٹرول لسٹ میں ڈالنے کی درخواست پر جسٹس شوکت صدیقی نے وزارتِ داخلہ کو حکم دیا کہ ایسے تمام مشکوک افراد کے نام ای سی ایل میں شامل کیے جائیں۔

طارق اسد ایڈووکیٹ کا یہ بھی کہنا تھا کہ توہین آمیز مواد یہ معاملہ سنہ 2014 سے چل رہا ہے اور ان کے موکل نے 15 جنوری 2017 کو تھانہ آئی نائن میں اس سلسلے درخواست دی تھی جس پر کوئی کارروائی نہیں کی گئی۔

ان کا کہنا تھا کہ اس معاملے میں ایف آئی اے سے بھی تحقیقات کی درخواست کی گئی تھی تاہم اس سے یہ کہہ کر انکار کر دیا گیا کہ انھیں دباؤ کا سامنا ہے کہ کوئی کارروائی نہ کی جائے۔

ان کا دعویٰ تھا کہ پی ٹی اے کے حکام سے جب اس سلسلے میں رابطہ کیا گیا تو انھیں بتایا گیا کہ 'آئی ایس آئی ایسا نہیں کرنے دے رہی۔'

خیال رہے کہ پاکستان میں ماضی میں بھی توہین آمیز مواد کی موجودگی پر مختلف ویب سائٹس پر بندش لگائی جا چکی ہے۔

سنہ 2012 میں پیغمبرِ اسلام کے بارے میں قابلِ اعتراض فلم 'انوسنس آف مسلمز' کی جھلکیاں دکھانے پر دنیا کی مقبول ترین ویڈیو سٹریمنگ ویب سائٹ یو ٹیوب پر پاکستان میں پابندی لگا دی گئی تھی اور تقریباً چالیس ماہ کی بندش کے بعد جنوری 2016 میں اسے اس وقت بحال کیا گیا تھا جب یوٹیوب نے پاکستان کا مقامی ورژن لانچ کیا تھا۔

Clear

25°C

اسلام آباد

Clear
Humidity: 85%
Wind: NNW at 6.44 km/h
Thursday 24°C / 28°C Thunderstorms
Friday 22°C / 26°C Thunderstorms
Saturday 21°C / 27°C Thunderstorms
Sunday 22°C / 28°C Thunderstorms
Monday 22°C / 29°C Thunderstorms
Tuesday 23°C / 29°C Sunny
Wednesday 23°C / 29°C Thunderstorms

تازہ ترین خبریں

کالم / بلاگ